Ostiralean lege bihurtuko da hezkuntza
erreformarako LOMCE proiektua. Espainiako Legebiltzarraren osteguneko
azken onespena baino ez du falta. Hilabete hauetan guztiotan, ikastolok,
hezkuntza komunitateak eta herri honetako ia alderdi eta erakunde
guztiek gogor salatu dugu egitasmo zentralista, zentralizatzaile,
atzerakoi eta elitista. Hala ere, eragile guztion kontrakotasuna
bilduta ere, ostiralean LOMCE izango dugu PPren gehiengo absolutuak
honelaxe ahalbidetuko baitu.
Bestalde, bihar, Madrilgo Kongresuak LOMCE
onartu bezperan, Eusko Legebiltzarrak ere eztabaida monografikoa egingo
du osoko bilkuran, lege egitasmo horri aurre egiteko eta lan-ildoak
zehazteko helburuarekin.
Berriz ere gogoratu nahi dugu, nazioarteko
azken ebaluaketa eta ebaluazio diagnostikoen eta espainiar Hezkuntza
Ministerioaren beraren arabera, Hego Euskal Herriko gure ikastetxeen
egoera, Estatuko beste sistemekin alderatuz gero: eskola uzte
goiztiarraren tasa, DBHko tituludunen portzentajea, goi-mailako
ikasketekiko titulazio-tasa, …, gure adierazleak nabarmenki hobeak
baitira. LOMCEk 2020 urterako proposatzen dituen helburuak dagoeneko
Hego Euskal Herriko ikastetxeetan lortutzat eman ditzakegu.
Era berean, badakigu zertan hobetu behar
dugun eta ikasleen konpetentzia guztiak garatzea dela aurrerantzean gure
erronka nagusia. Testuinguru honetan LOMCEren helburuak euskal eskola
komunitateentzat ez dira esanguratsuak, ez dira egokitzen gure
errealitatera; soberan daude. Eta hau da gure abiapuntua, LOMCE arrotza
da gure artean, LOMCE kaltegarria da (atzerantz joatea proposatzen
digu), LOMCEk ez digu balio.
Ondorioz, LOMCEren aplikazioa nola ekidin
izan behar du helburu, hari aurre nola egin aztergai bihurtu behar dugu
gure artean. Eta bide honetan irizpide batzuk plazaratu nahi ditugu.
Lehenengo eta behin sistema-mailako
erantzuna behar du. Zerbait egitekotan EAEko ikastetxe guztietan
aplikagarria izan behar du. Proposatzen den edozein neurrik sistema osoa
izan behar du helburu. Eta horrek EAEko erakundeen inplikazioa eta
lidergoa eskatzen ditu.
Joan den astean, adibidez, Eusko
Jaurlaritzak iragarri du Espainiako Auzitegi Konstituzionalera joko
duela LOMCEri aurre egiteko. Pentsatzekoa da, honezkero, bere zerbitzu
juridikoek egin dutela edo amaitzear dutela txosten juridikoa.
Ikastolok, beste eragile batzuek bezala, eskatu diogu jada txosten hori
lehenbailehen gure esku jartzeko, guk ere azter dezagun. Agian, izaera
honetako edo beste klase bateko ekimen gehiago jar daiteke mahaiaren
gainean.
Izan ere, artikulu honen goiburuan diodan
bezala, elkarlanerako garaia da hau. Ikastolon aurtengo ikasturtearen
irekiera ekitaldian ere azpimarratu genuen ideia hau. Elkarlana ari gara
eskaintzen eta elkarlana ari gara eskatzen. Elkarlana hezkuntza
eragileen eta komunitatearen artean, elkarlana alderdi, erakunde eta
hautetsien artean, elkarlana sindikatuen artean eta elkarlana
gainontzeko eragile askoren artean gure hezkuntza sistemak aurrean
dituen erronka itzelei erantzun egokiak emateko, elkarrekin ekinez eta
ahalik eta adostasun handienarekin. LOMCEren aplikazioaren erronka ez da
eragile politikoen erantzukizuna soilik, hezkuntza eragileon ardura ere
bada.
Espero eta desio dugu eztabaida sakon eta
emankorra izan dadin eta adostasun zabala lor dezaten, aurrera begira
LOMCEri aurre egiten jarraitzeko bezala, hezkuntza sistema gaurkotzeko
eta sendotzeko ere.
Urriaren 12an, Bilboko manifestazio
jendetsuan kalera irten ginenean, LOMCEren aurka protesta egitera ez
ezik, Euskal Herrirako hezkuntza sistema eta lege propioa aldarrikatzera
ere irten ginen. Hori da gure xede nagusia. LOMCEri aurre egiteko,
hezkuntza hobetzeko, erronka berriei egoki erantzuteko, gurea munduko
hezkuntza sistema hoberenen parera eramateko bide egokien eta
eraginkorrena baita Hezkuntza Sistema eta marko normatibo propioak
edukitzea.
Eusko Jaurlaritzaren Heziberri 2020
plana, Euskal Herri osorako ez izan arren, izan daiteke EAE mailan ate
zabal bat bide horretan. Labur-labur esanda, euskal curriculuma
garatzeko eta dekretu bidez arautzeko eta Hezkuntza Lege berri bat
adosteko egitasmoa da Heziberri 2020. Guk plana bere
osotasunean ikusten dugu. Alegia, euskal curriculuma adostuta, hankamotz
geratuko litzateke hezkuntza legerik ez bagenu; eta zertarako hezkuntza
lege bat, euskal curriculumik gabe?
Beraz, denon artean adostutako euskal
curriculuma garatzeko eta babes juridikoa emateko unea da. Hezkuntzaren
kalitatean eta ekitatean aurreratzeko, hezkuntza zerbitzu publikoaren
definizio adostua egiteko, Hezkuntza Legea egiteko unea da. Lehentasuna
bihurtu behar dugu, sare publiko eta kontzertatuen arteko dikotomia
antzua gaindituz, bakoitza bere izaeratik, berdintasunean, finantzaketa
egokiarekin, irakasleen homologazioarekin, aukera berdinekin.
Alegia, eraiki dezagun eta eman diezaiogun
zilegitasuna gure hezkuntza sistemari. Baina egin dezagun hori gure
hezkuntza sistema etengabe hobetuz joan dadin, euskal curriculumean
oinarrituta, eskaintza pedagogiko aurreratuenarekin eta
aurrerakoienarekin. Eta, berriro azpimarratuko dut, elkarlan estuarekin
eta ahalik eta adostasun handienarekin.
|
No comments:
Post a Comment